كيف تصطادين عريســـاً...

[الأستاذة]

إلى كل سحلية واقفة في حلق أهلها وما عارفه تتصرَّف مع إنهم خاتِّين معاها أُخُتا مجاناً لزوم الترويج وكدا!!!

إليكي يا إنتي..

كيف تصطادين عريساً باستخدام الأساليب الحديثة غير المكلفة وذات الأثر؟


للإجابة على هذا السؤال خذي بالآتي:

1.أول خطوة ركِّزي على النسوان العجايز.. وبخاصة (أم الحريف) العليو النظر.. (ما تعايني لي كدا قصدي العريس).

2.خليكى لاصقه جنب أمك وبطِّلي عوارة وجرى ورا البنات صحباتك (شِن سوِّيتي بالخفة والهبالة يالفالحة؟!!)

3. لمَّ تكوني ماشَّة راسك الكبير دا تختيو بين كتافينك وأبداً ما ترفعى لي فوق عشان يقولو مؤدَّبة وما متقندفة وبطِّلي فلهمتك الما جابت ليك غير البلاوي!!

4.كلمة خالة دي خليها طوالي فوق لسانك وخاسةً لي (أم الحريف هي قصدي العريس) عشان تحس بالتميز من بقية العجايز القاعدات معاها (ما في مانع تنادى واحدة تانية بخالتك الدنيا ما معروفة يمكن الخطة ما تنجح وفي الحالة دي لساتكك ما تطير وبكون عندك بديل جاهز.. وخلي بالك العمر جاري ).

5.أول ما أمك تبدا الكلام ألكزيها بي تحت من غير ما زول يحس عشان تدخِّلك الموضوع حتى لو ما كان عندك مزاج.. زي ما بقول المثل كَترَت الكلام تكسر الحديد.!! (عارفك ح تقولي لي المثل دا ما ليو داعى بس ما لقيت لي مثل غيرو!!!!).

6. أخوانك الصغار أجرى وراهم واعملي انك مهتمة بيهم كأنك أمهم عشان (أم العريس) تقول عليك إنك حنينه على أولادك (ربنا يخلف عليك)...!

7.كل شي تاكلو أم العريس ويكون حلو خلي أمك تقول والله نفس الأكلة البتسويها بتي (حتى ولو كانت أكلة من المطعم الصينى!!).

8. لو مديتي إيدك لي شي (اريتا بالكسر) اتوجَّعى واتنهَّدي (بس براحة كدا.. لأنو صوتك شين) خلى أمك تقول يديها العافية انا أقوليها ما تنضِّفى الشارع إلا هي كاتلاها النضافة (ولو جينا للجد تلاقيك اوضتك ما قادرة عليها والصراصير سيرة عرس بي دلاليكا.!!!).

9.بعدين لما تقعدي خليك قاعدة في الطرف وشدِّي طولك زى البالعة ليك عود عشان طولك ما ينقص (الكلام دا للقُصار تحديداً..!!).

10.إذا النسوان العجايز ديل اتكلمو عن أي عرس اكتمي نَفَسِك لغاية ما خدودك يحمِّرَن عشان يقولو البت خجلانة (وأعملي حسابك ما تكتمي نفسك للنهاية بعدين تروحي فيها وتودينا فى داهية..!!).

11.مهما كان الموضوع حماسي خليكي راااااسية وتقيلة وبطِّلي خفَّة وما تنحشرى فيو (التِحشِّر دا بتجيب أجل الخطة كلها وطيارتك ح تقوم..!!).

12.شعيراتك ديل خليهن مفرودات أوعك من الطاير والمنكوش (النسوان العجايز ديل جنهن وجن الشعر المنكوش..!!!).

13. اها أكان العجوز (أم السجم قصدي العريس) قالت أي حاجة أكان سياسة ولا اقتصاد إن كان مسيخ وما منطقي ولا أفقي (حتى لو قالت أمبارح بوش كان فاطر معانا) قولي بي حُسن نية وبراءة وليه يا خالتي ما كلمتينا نجي نساعدكم؟!!

14. إي عرس قاعدة فيو (ام العريس) أوعك من النطيط والرقيص.. اهمدي واتلمى وقولي بطريقة تسمعا (إنو الرقيص دا عيب)..!!

15. لو جات سيرة السوق خلى امك (ربنا يصبرا عليكي) تقول بناتى أصلن ما بمشن السوق وأي حاجه بجيبا ليهن ابوهن (وتلاقيك حايمه السوق زى بتاع الترمس)..
16- اقفلى الموبايل اوخليهو صامت عشان ام الكوتش ماتقول البت جنها تلفونات(ودى حقيقه اصلا )
احتمال وارد

بينك وبين نفسك ممكن تقولي إنو العجوز (أم صاحبنا) خاتا عينا على وحده تانية والبتسوي فوقو إنتي دا ح يروح شمار فى مرقه ساي!!! أوعك تصدقي الأوهام دي.. ركزي في تنفيذ الخطة والحاجة ح تقع يعني ح تقع وح تجيبي كثافتا لا محالة بي حركاتك دي..!!
الشغل الخاص بالعريس
1.اها (أم العريس) بعد ما تخش الشبكة.. نجي بقى للعريس ذاااااااااتو.. وأول تبادي اتلمى وخليك فى بيتكم واوعك من الحوامة..

2.أكان جاكم العريس خلى أبوك يقول ليو والله لازم تشوف البت وتاخد راحتك عشان ما تقول غشيتونى بس هى بتنكسف تظهر عليك كدى ادينا مهلة نقنعا (دي طبعاً وهمة ساي)..!!

3.قبل ما يجى اليوم اليشوفك فيو العريس بحوالى أسبوع كدا (حسب شنات وشِّك) لفي من كوفير لي كوفير.. ومن صبغة شعر لي فرد ضهر.. وتنظيف طبلون ونتف شعيرات العيون وما تنسى شعيرات الرقبة التحت الدقن وما تقصري أبداً فى روحك (دا عريس يالمطرطشة وجا بعد وجع سنين )..!

4. لما يجى (مقطوع الطاري) خلى أخوك يكون معاك واقف جنب الشباك يضاري الضو عشان المسكين يخجل منه وما يشوف حاجة ويظهر المخبي.. وضو الشباك يبيِّن المندسِّي.. تطبيقاً لنظرية اللمحة ضبحه (ما تسألوني عن المثل دا أنا جبتو من وين..!).

5. اها بعد دا يجي أبوك داخل أكان حظك سمح العريس ح ينط فى راس ابوك وهاك يا بوس لامن يقرب يشفط مخوو.. وطوالي ح يسألو.. أها ياعمي العرس متين؟!!

6.بعدا الله يوفقك وما تنسينا من حلاوة العرس.. بس حسك عينك تقولى لى زول منو العلمك الكلام دا.. الحُسَّاد كُتااااااااار.. تجي وحده من اياهم تستعمل نفس الخطه ولساتكك تطير وتمشي بي عجل حديد بعد اك.!
تحذييييييييير
ابعدي من العجايز المتعلمات البلبسن الجزمه لون الشنطه الماشا مع الفستان.. ديل مصايب ودايرين خطط جهنمية أنا ما بقدر عليها..!
نصيحه
صحباتك ح يلاحظن التغييرات الحاصلة ليك اوووعك لسانك دا أبلعي وسرك خلي فى بير بطنك وإلا لساتكك ح تطير قبل العريس..!

[ودشاع الدين]

هههههههههههههههههههههههه والله عجيييييييييييييييييييييييييييييييب لا يمكن مشاهدة الصور للزوار لا يمكن مشاهدة الروابط للزوار للتسجيل اضغط هنا

[الأستاذة]

ود شاع الدين....
هو انت لسه شفت حاجة...
وإن كيدهن لعظيم...
تسلم على المرور

[كيلو غرام]

تسلمي الأستاذة


والله العريس والعروس

دي تجري ورا دا

ودا يجري ورا دي

زي توأم جيري

همسة

جاري وجارين ورا

[محجوب كمال محجوب]

قمة الروعة الطعم دا اجيب دسته عرسان ..
تسلمى واديك العافية انشاء الله ..

[الأستاذة]

المشاركة الأصلية كتبت بواسطة كيلو غرام لا يمكن مشاهدة الروابط للزوار للتسجيل اضغط هنا

تسلمي الأستاذة


والله العريس والعروس

دي تجري ورا دا

ودا يجري ورا دي

زي توأم جيري

همسة

جاري وجارين ورا

كيلو...حب..
شايف الحال ده..اي زول جاري ورا التاني...


انت ماتزيد سرعة الجري ده عشان تصل...



تسلم على المرور

[الأستاذة]

المشاركة الأصلية كتبت بواسطة محجوب كمال محجوب لا يمكن مشاهدة الروابط للزوار للتسجيل اضغط هنا

قمة الروعة الطعم دا اجيب دسته عرسان ..
تسلمى واديك العافية إن شاء الله ..

الاخ..
محجوب كمال.. (جدو)

والله البنات الزمن ده عندهن الغاية تبرر الوسيلة... لعل وعسى يفكن بورتهن..

تسلم على المرور..

[كيلو غرام]

المشاركة الأصلية كتبت بواسطة الأستاذة لا يمكن مشاهدة الروابط للزوار للتسجيل اضغط هنا

كيلو...حب..
شايف الحال ده..اي زول جاري ورا التاني...


انت ماتزيد سرعة الجري ده عشان تصل...



تسلم على المرور

وين ياأستاذة

اجري وراها

دنا لو جريت وراها الحنان يرفع سعر

اخير تجري وراي هي

وانا اكون مخفض سرعة التيار

[الأستاذة]

المشاركة الأصلية كتبت بواسطة كيلو غرام لا يمكن مشاهدة الروابط للزوار للتسجيل اضغط هنا

وين ياأستاذة

اجري وراها

دنا لو جريت وراها الحنان يرفع سعر

اخير تجري وراي هي

وانا اكون مخفض سرعة التيار

لا بالغت ياكيلو غرام..
ده ماسمعنا بيه بت تجري ليه ورا ولد...

بعدين خليها ترفع السعر..
الغالي بغلاته يضوقك حلاته...
والغالي للغالي..

ولا شنو.. ياكيلو غلا..

[كيلو غرام]

المشاركة الأصلية كتبت بواسطة الأستاذة لا يمكن مشاهدة الروابط للزوار للتسجيل اضغط هنا

لا بالغت ياكيلو غرام..
ده ماسمعنا بيه بت تجري ليه ورا ولد...

بعدين خليها ترفع السعر..
الغالي بغلاته يضوقك حلاته...
والغالي للغالي..

ولا شنو.. ياكيلو غلا..

ده ماسمعنا بيه بت تجري ليه ورا ولد...

والله شده ما خليناهم يجرو ورانا علي الطلاق وهي لسه ماجات كلو يوم خاشه بوتيك تشتري حذاء جديد ههههههه

لكين الغالي دا بيلعب بي شعور الأخرين ماكل بعض البنات
تكون خاتا واحد للرصيد والتاني احتياطي والثالث تسليه

همسة
توقعي من الزمن اي حاجه والله انا خايف النسوان يجيبو الشيله للرجال

اسمعي الغنية دي
انا جريت ليه حفيانه ماقصدت الخاينه قصدت يقيل معنا